Iruñeak eta Pauk elkarlan proiektua partekatu dute Baluarten egindako POCTEFA 2021-2027 programaren amaierako ekitaldian, María Bezunartea Iruñeko Udaleko Turismo Zerbitzuko zuzendariaren eskutik.

GREENMICE 2P proiektua azaroaren 16an egon zen NAVARREFA 2021-2027 ekitaldian, Nafarroan Interreg POCTEFA mugaz gaindiko lankidetza programaren (Espainia-Frantzia-Andorra) amaierako ekitaldian, Baluarten, Iruñeko kongresu-jauregian. Nafarroako Gobernuko Memoria eta Bizikidetza, Kanpo Ekintza eta Euskara Departamentuak antolatu zuen jardunaldia, Kanpo Ekintzako Zuzendaritza Nagusiaren bidez, eta programaren onuradun diren 85 nafar proiektuak bildu zituen, azoka eta eztabaida gunea uztartzen zituen formatu batean.

Mugarik gabeko lankidetza, etorkizun partekatu baterako

“Mugarik gabeko lankidetza, etorkizun partekatu baterako” lemapean, topaketak 250 pertsona baino gehiago izan zituen izen-emanda. Ana Ollok, Nafarroako Gobernuko presidenteordeak, jardunaldia ireki zuen, mugetatik harago eta Europako esparruan elkarlanean aritzeak duen garrantzia nabarmenduz, une honetan Pirinioetako Lan Elkartea buru duen eta ekosistema sozioekonomiko eta ezagutzazko oso aktiboa duen eskualde batean.<br/>

Programak aurkezpenak eta mahai-inguruak izan zituen, Europako Batzordearen eta POCTEFA esparrua osatzen duten zazpi lurraldeen ordezkarien parte-hartzearekin. Programaren etorkizunaz aritu ziren, 2028-2034 urte anitzeko finantza esparru berrian (oraindik negoziazioan dagoena), Pirinioetako mugaz gaindiko lankidetzaz eta Europako lankidetza funtsak lortu dituzten nafar erakundeen arrakasta-kasuez. Bertaratuek, gainera, 85 proiektuak erakusten zituen azoka-eremua bisitatu ahal izan zuten, eta Kanpo Ekintzako Zuzendaritza Nagusiak prestatutako katalogoa jaso zuten. Jardunaldia aurkezpen laburren saio batekin itxi zen: “Nire POCTEFA minutu batean”.

Proiektua, María Bezunarteak azalduta

Esparru horretan, María Bezunarteak azaldu zuen zertan datzan GREENMICE 2P: “Mugaz gaindiko lankidetza proiektu bat da, bi hiriok, Pau eta Iruña, elkarlanean ari gara MICE sektorearen inguruan mugaz gaindiko helmuga komun bat sortzeko; hau da, kongresuekin eta ekitaldiekin lotutako sektorearen inguruan”.<br/>

Zuzendariak abiapuntu partekatuak azpimarratu zituen: “Ezaugarri asko dituzten hiriak gara. Aldi berean, unibertsitate, zientzia eta teknologia sektore garrantzitsua dugu, baina txikiak gara MICE sektorean. Horregatik, batasunak indarra egiten du: hori da proiektuaren ideia, nolabait”.

Martxan dagoen proiektu bat

GREENMICE 2P 2026ko urtarrilaren 1ean hasi zen eta hiru urtez garatuko da. Europar Batasunak % 65ean kofinantzatzen du, Interreg VI-A Espainia-Frantzia-Andorra Programaren (POCTEFA 2021-2027) bidez; haren helburua muga-eremuko integrazio ekonomikoa eta soziala indartzea da. Iruñeko Udala da buru, Nafarroan NICDOrekin eta Nafarroako Ostalaritza Enpresen Elkartearekin (AEHN) batera, eta Frantzian Pau-Béarn Pyrénées Turismo Bulegoarekin, Pau Béarn Pyrénées Événements-ekin, Béarneko turismo klusterrarekin eta Pauko Aglomerazio Komunitatearekin (Communauté d’Agglomération de Pau).

Zentzua duen eszenatokia

Ekitaldia Baluarten egitea ez da kasualitatea: kongresu-jauregia, proiektuko bazkide den NICDOk kudeatzen duena, Espainiako kongresu-espazio karbono-aztarna txikienetakoa da eta energia-autokontsumorantz aurrera doa; GREENMICE 2P-k Iruña eta Pauren MICE eskaintzaren erdigunean jarri nahi duen jasangarritasunaren adibide bat.